हुशार बुलबुल

🔶गोष्टीचे नाव-हुशार बुलबुल

🔶अनुवादक-डॉ.अस्मिता भस्मे

🔶मूळ स्रोत-युरोपियन

सृष्टी वसंताच्या आगमनाने मोहोरली होती.निसर्गामधे नवचैतन्य पसरले होते. अशा या रम्य वातावरणात एक सरदार फेरफटका मारण्यास बाहेर पडला. फिरता फिरता वाटेत त्याला एक बुलबुल नजरेस पडला.सरदाराच्या मनी हाव उमटली.आपण याला आपल्या महालात सोनेरी पिंजऱ्यात बंदिस्त करूया म्हणजे याचे सुमधुर बोल दिवसभर आपल्या कानी पडतील. सरदाराने थोडा आटापिटा करून बुलबुलाला आपल्या कचाट्यात पकडलेच. बुलबुलाने आपल्या सुमधुर आवाजाने सरदाराला विनवणी केली की तू मला सोड...त्याबदल्यात मी तुला बहुमूल्य अशा दोन हितकर गोष्टी सांगून ज्या तुला आयुष्यात खूप लाभदायक ठरतील.

  सरदाराने बुलुबुलाची मुक्तता करण्याचे मान्य केले.
बुलबुलाने त्याला देन उपदेश दिले:
    १. ज्या गोष्टींची आपण पुनरावृत्ती करू शकणार नाही त्याबद्दल कधीच पश्चात्ताप करू नये.
  २. भूलथापांना कधीही बळी पडू नये.

  बुलबुलाचे हे उपदेश ऐकल्यानंतर सरदाराने त्याला स्वच्छंद हवेत उडण्यासाठी मुक्त केले.बुलबुलाने आपल्या इवल्याश्या पंखांनीआकाशात भरारी घेत सरदाराकडे वळून म्हटले,'अरेरे... तुला माझ्याकडे असलेला खजिना द्नात असता तर तू मला कधीच जाऊ दिले नसते.माझ्या पंखाखाली एक भव्य अनमोल रत्न आहे. जर ते तू घेतले असते तर तू अजून गर्भश्रीमंत झाला असतास.

   हे ऐकून सरदाराला पश्चात्ताप होऊ लागला व त्याने बुलबलाला परत पकडण्यासाठी धाव घेतली. त्याची ती तडफड पाहून बुलबुल म्हणाला, 'अरे मला माहित आहे तू हावरट आणि मूर्ख आहेस. तू मला परत पकडू शकणार नाहीस याचा तुला पश्चात्ताप होतोय. तू माझ्या भूलथापांना फसलास.एखादे भव्य रत्न मी माझ्या इवल्याश्या पंखाखाली कसे काय दवडू शकेन?

   एवढे बोलून बुलबुल आनंदाने निळ्याभोर आकाशात स्वच्छंद पणे फिरू लागले.

धन्यवाद!

#ज्ञानभाषामराठीप्रतिष्ठान
#अनुवादिनी